- on.cc 東方互動主頁
- 4月5日 (六)
新民黨將於本月十四至十五日到深圳舉行兩日一夜集思會，但實際地點喺邊就有好多傳聞，但一直都冇得到有關方面確認。該黨主席兼立會議員葉劉淑儀尋日趁會議空閒時間，聯同黨內一班區議員，包括多名公民力量（公記）沙田區議員一齊請人食壽司。葉太趁機大談集思會計劃，但當被問到會議舉行地點，仲有咩人會參與會議，佢就一概封口，話班黨友到嗰日上車後就知喎！
集思會要去到深圳開，搞到咁神秘，莫非有特別人物做嘉賓？當葉太被問到呢個問題，佢就照樣唔答，仲意圖扯開話題添。佢話，作為政黨梗係會傾選舉嘅事啦！至於唔透露地點，就係為咗要保護有意參選或準備參選嘅朋友喎。跟住葉太就同公記一班兄弟講，佢會帶埋屋企兩支珍藏多年嘅三十年茅台去集思會，呢兩支茅台係由「茅台黃」送嘅。咁邊個係「茅台黃」呢？咪係立法會前議員黃宜弘囉！
葉太話，「茅台黃」送嘅酒一定係好嘢，集思過後就一齊暢飲一番。葉太又問公記邊個最飲得，而公記班議員就齊齊指住身兼新民黨副主席嘅公記主席潘國山，似乎大家想灌醉潘國山咁喎。
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
