政情：八網難逃：獨食五香肉丁米 麥美娟被指邪惡

話說工聯會嘅勞工界議員何啟明日前喺社交網站Facebook貼文，叫大家估吓邊個最邪惡？咁爆，邊個得罪佢？咪勞嘈住，睇埋張相先，其實講緊食嘢啫！佢上載咗一張相，張相應該有四個人喺度，但見唔到樣，只係見到枱面有三碗麥皮、一碗五香肉丁加腸蛋米粉，佢就叫大家估吓邊個最邪惡，竟然食五香肉丁？

個Post出街之後惹起好大回響，有網友認同「五香肉丁！美麗邪惡！」有網友就估最邪惡嗰個人係高嘅嗰位，睇嚟呢位網友已經知道喺度嗰四位係乜水。

網民：竟然係美麗的辣妹

未幾，何啟明就開估，再上載咗張相，在座嘅係四名工聯會議員，當中包括何啟明、陸頌雄、郭偉強同麥美娟，何啟明仲話男士都食得好健康，咁食五香肉丁嗰個即係麥美娟喇！有網友直言估唔到係女士食五香肉丁米粉，有網友就估係郭偉強，跌晒眼鏡，亦有網友話「竟然係美麗的辣妹」。

何啟明就留言自嘲「窮到連食五香肉丁的錢都冇」。唔知係咪想幫麥美娟洗脫「罪名」，郭偉強就留言話：「平時我都吃丁蛋丁（五香肉丁加蛋出前一丁），但早兩日瀉完，所以才出現三對一的畫面。」唔怪得食得咁健康喇！