中環出更：蔣麗芸出問卷 問人有冇諗過自殺

嬰兒基金力推多年仍不果

翻查資料顯示，Ann姐建議設立「嬰兒基金」嘅概念早於二○一四年底已曝光，建議政府可向每名出世嬰兒派發一萬元，然後每年視乎財政盈餘再注資，直至十八歲為止，之不過Ann姐連續多年向政府提出建議，都未見有新進展。

據知Ann姐對此未有氣餒，繼續堅持「嬰兒基金」建議可行，最近更親自出手為「嬰兒基金」自製問卷，不過問卷設計內容，似乎有啲令人摸不着頭腦，事關問卷撇除填寫個人資料，合共有六條問題，當中有四條均問及自殺嘅內容，包括「若你有完善嘅生涯規劃，會否打消自殺念頭」等，而今次問卷最後兩條才進入正題，問及受訪者係咪同意成立「嬰兒基金」，以及政府為「嬰兒基金」注資嘅方式。

Ann姐接受查詢時解畫，依家本港父母育兒壓力極大，有輕生念頭唔出奇，佢正想透過問卷去反映父母們面對嘅困境；佢又補充，其實問卷目標人士唔止父母，連受惠兒童、青少年等都係對象，因此已將問卷派往全港中學，唔知最終有幾多學生願意回覆呢次問卷呢？

卓妮