政情：爭九西補選位白鴿黨鬼打鬼
港府至今仍未公布青年新政游蕙禎及梁頌恆，二人被取消議員資格後有關九龍西及新界東議席空缺嘅補選日期，但各大陣營已經提早爭崩頭「霸位」，其中唔好以為有個別政黨打退堂鼓唔派代表出選，泛民一方就少咗人想分一杯羹，實情係由胡志偉領導嘅民主黨（白鴿黨），新舊勢力對九西議席都各懷鬼胎，原本預料獲得該黨力捧嘅白鴿黨司庫袁海文，其實係腹背受敵，先有屯門一批老鴿想推舉已故立法局議員吳明欽嘅女兒、大律師吳思諾「空降」九西；至於被視為九西地頭蟲，早前於民協「過檔」加盟嘅九龍城區議員蕭亮聲亦疑似想落場一試身手，白鴿黨一場地區內鬥一觸即發。
不分建制、泛民對於游梁議席空缺虎視眈眈，其中泛民陣營，白鴿黨對九西補選議席有興趣於政圈已係公開秘密，據聞該黨更加喺負責協調各大民主派政黨進行初選嘅民主動力會議上，同其他民主派講明有意派出深水埗區議員袁海文落場參選。
老鴿欲撐吳思諾「空降」
雖然白鴿黨已就補選一事表達傾向，綜合各方消息，袁海文正被內外夾擊，有被取而代之嘅可能，首先該黨部分元老有意推薦已故「三料議員」吳明欽嘅女兒吳思諾落場參選，有白鴿黨中人坦言，吳思諾本身就流住白鴿黨嘅血，只要對方願意考慮加入戰團，預料吳明欽過去於新界西舊部，特別係屯門嘅黨友及支持者，肯定會「跨區」力撐。吳思諾接受查詢時稱唔會參與九西補選，但亦疑留有尾巴，承認自己有意從政，未來希望於法律界同政界雙線發展。咁會令人聯想，有人係咪等待一個合適時機，尋求一炮而紅。
蕭亮聲隨時撬人「開價」
另一個來勢洶洶嘅八十後新「乳鴿」係蕭亮聲，據知呢名前民協成員有意參與補選初試啼聲。有知情人士透露，蕭亮聲加入白鴿黨，其中一個原因就係想喺政途上更上一層樓，有分析指蕭亮聲最大優勢係同另外五名已退出民協嘅區議員有一定交情，如果可以成功爭取佢哋齊齊加入白鴿黨，對於依家喺九西只有三個區議員嘅白鴿黨來講，實在係有一定吸引力，而佢亦有本錢向白鴿黨討價還價，隨時可以「開價」要求成為九西新嘅領軍人物。
不過講到尾，白鴿黨新舊勢力於九西補選一事「鬼打鬼」，唔講仲以為呢個補選議席嘅出線權已坐定粒六，實情上係民協前立法會議員馮檢基，引發「七警案」嘅前公民黨成員曾健超均磨拳擦掌有意落場參選，由於民主動力協調民主派嘅初選都係只聞樓梯響，睇怕類似爭出選、爭上位嘅政圈風聲只會繼續沒完沒了。