中環出更：青聯換屆周沁變「永遠最靚司庫」
香港青年聯會（青聯）尋日舉行周年大會選出新一屆會董會成員，現任常務副主席郭永亮（Andy）即將接替主席吳傑莊，於七月一日擔大旗出任主席。將出任秘書長嘅常務副秘書長何迪夫笑言，升呢為副主席嘅司庫周沁將成為「永遠最靚司庫」，事關來屆司庫一職將易名為財務長，周沁咪係「末代司庫」囉！
今次改選有多人更上一層樓，包括副主席蔡德昇成為常務副主席、秘書長柯家洋升做十四位副主席其中一個，而正名後嘅首位財務長係劉婷。
將集中培育非尖子年輕人
獲選做新一屆主席嘅Andy話，今年係佢加入青聯第十年，特別有意思。對於政府最新公布去年堅尼系數創四十五年來新高，而在職貧窮人口當中亦有唔少係大學生，Andy希望嚟緊多啲由年輕人角度出發，了解佢哋嘅需要。好似佢哋有由學生組成嘅香港青聯學生交流網絡，唔單止舉辦活動畀年輕人參加，仲畀佢哋參與籌備，令活動更切合佢哋需要。
Andy仲話，根據過往經驗所得，青聯每年五、六月舉辦嘅招工日成效一般，因為成績突出嘅學生一般早於年初已搵到晒工，而剩下嘅可能始終未能符合空缺要求，顯示配對過程或有落差。故來年會着眼投放資源於一班非尖子類嘅年輕人身上，因為成績最好嘅其實已有好多幫助，反而係其他例如副學士學生，可以學習更多新技術，例如VR等，以助佢哋提升個人競爭力。
卓妮