政情：邵家臻唔敢着「工人褲」開會

出街買衫愛做「獨行俠」

講開潮流興網購，但邵家臻就話自己比較老土，平時唔會網購，上網只係睇吓款式同新資訊，鍾意出街先會買衫，覺得試上身先知啱唔啱自己。佢解釋，着衫比較個人化，自己先最清楚適合着啲乜嘢，所以佢會鍾意自己一個人出街買衫，就算同女友出街，都傾向會各有各睇。佢又教路，要着啲非主流嘅衫，係需要個人夠膽量去着。

眾所周知，邵家臻係社工同大學講師，但熱愛時裝嘅佢到底有冇諗過轉行，向時裝界發展呢？佢就話自己冇諗過，覺得要對人有一定嘅認識，了解佢嘅喜好先可以知道乜嘢衫先適合，所以平日除咗熟悉嘅朋友外，佢都唔敢亂畀意見。