政情：怕囝囝依賴 陳家珮忍心唔抱
小朋友嘅習慣要自細開始培養，新民黨南區區議員陳家珮（Judy）今年年初生咗個仔，佢話囝囝好曳，被佢寵壞咗，一定要抱住先肯瞓。點知醫生同佢講咁樣唔係咁好，會令到小朋友過於依賴，所以佢依家開始要忍心啲，唔抱咁多，幫囝囝搣甩壞習慣。佢話據醫生估計，只要一兩個星期，就可以調節得番，同時，搣甩咗之後，都可以令自己有覺好瞓啦！
Judy又話已經幫囝囝排隊報Playgroup，自己以前都唔信要咁，但依家覺得囝囝日日對住工人姐姐都唔係辦法，應該搵啲專業人士同佢玩吓，咁會發展得好啲，又可以習慣吓社交生活。
仲未計劃生多個
至於會唔會生多個呢，Judy就話言之尚早，湊掂呢個先諗，若生多個，屋企可能就換大啲，又要視乎工作上係咪應付到。被問到幾時接黨主席葉劉淑儀班呢？Judy就強調仲跟緊葉太學嘢，有排都未接到班喎。