中環出更：馬紹祥料離任 韋志成唔入熱廚房
曾傳出喺下屆政府留任發展局局長嘅馬紹祥尋日出席智慧城聯盟一周年慶典時，被問及會否留任，佢直認打算七月後放假，意味佢唔會繼續留喺「熱廚房」，而同場嘅市建局行政總監、曾任發展局常任秘書長嘅韋志成亦承認，候任特首林鄭月娥曾邀請佢加入下屆班子，「我諗佢唔搵我做局長係冇人會相信嘅」，但兩人經過詳細討論後，認為佢留喺市建局較好。
韋稱留市建局解決問題
韋志成話因為市建局有好多問題，如果佢僅出任行政總監約一年又離任，對市建局整個發展唔太好，尤其上任行政總監亦係約一年就離任，「況且我做市建局唔代表我幫唔到林太o架嘛」。被問到會否完成任期後加入政府，韋志成笑住反問「做完個任期三年，我點入得政府，佢（局長）個任期五年o架嘛，到五年後我好老o架啦」。
佢又重提早前曾撰寫網誌講述有關未來市建局重建嘅新設計點樣靈活運用空間，但市民卻將重點放喺市建局只想建細單位。被問到認唔認同喺郊野公園建屋，佢認為應研究唔同增加土地嘅方案再作比較，先知道邊種方法較好，但現時社會出現一個問題就係「連研究都唔畀」。
卓妮