中環出更:無懼恐襲 丁毓珠照幫愛孫撲飛

上海總會早前舉行四十周年晚宴暨新一屆理監事會就職典禮,新任理事長李德麟、監事長王緒亮等江浙滬名人聚首一堂,東區區議會前主席丁毓珠(珠姐)同婦協主席林貝聿嘉等都有到場。卓妮見珠姐成晚好頻撲,原來佢幫十二歲嘅孫女撲美國樂壇小天后Ariana Grande香港演唱會嘅門票。

Ariana早前喺英國舉行嘅演唱會遭遇恐襲,導致多人死傷,唔通珠姐唔怕小朋友有危險?佢就話唔怕,喺香港唔驚喎!

楊紹信教路 入市要審慎

同場仲有做鐘錶生意嘅總會副理事長高叔平(Henry)及太太Betty、婦協副主席高靜芝等人,卓妮見Henry同馬會大董楊紹信好好傾,原來佢哋係總會旗下投資委員會嘅聯席主席,負責幫個會投資賺錢。唔知依家投資乜嘢好呢?楊紹信話最近港股升咗唔少,股民入市要審慎,千祈咪聽冧巴、炒消息。

講講吓,佢笑稱若Henry間鐘錶公司上市就一定要買嘞,因為有咁勤力嘅老細睇住實掂喎!不過,業界都知Henry無意畀間公司上市喇!Henry就教路話,如果想入市就要買大藍籌。

當晚現場布置好有心思,重現典雅、大氣嘅海派風格,負責籌備嘅總會青委聯席主席高鼎國同車弘健功不可沒。惜食堂創辦人董愛麗(Gigi)同家人都有到場,Gigi話惜食堂現時日供七千個飯盒,佢想增加至一萬個,惟廚房已飽和,所以要努力搵善款至得喇!

卓妮

第一手消息請下載on.cc東網iPhone/iPad/Android/Windows Phone Apps