政情：鍾國斌否認自薦做局長

卿姐尋日主持節目時，一開口就話聽聞Felix有意加入問責團隊，仲話傳聞張宇人想做官唔係準確消息，事實係Felix自己想做官！Felix對消息似乎好驚訝，仲即刻反問「我？我做乜嘢好呢？」卿姐或者睇準佢係商界出身，於是笑笑口介紹佢出任商經局局長！Felix聽到就耍手擰頭，話自己依家好輕鬆，三點幾就可以「蛇」去搵卿姐做訪問，仲賣口乖話自己做咗官就唔能夠同卿姐傾偈。

順勢幫張宇人表態唔做官

Felix話社會對官員嘅尊重程度低咗好多，令新政府邀請唔少人出任問責班子時都碰壁，又指依家做官講錯一兩句話，都會令身邊嘅人受影響，令唔少人都因為家人反對而唔做問責官員，更指政府依家「熱廚房咁鬼（慶）」，要搵人都好困難，連張宇人都唔願意做局長！

另外，佢同另外兩位議員廖長江及郭榮鏗早前已計劃安排一個冇前設、冇特定議題嘅飯局，希望邀請其他黨派一齊食飯，先討論經濟、民生議題，嘗試締造跨黨派良好氣氛。