政情：民協六人出走 馮檢基萬箭穿心
政黨新舊交替係大勢所趨，泛民多個政黨於去年九月立法會選舉成功換上新生代接班，唯獨係成立超過三十年，盤據於九龍西嘅民協在該次選舉不但全軍盡墨，而該黨元老馮檢基（阿基）更成為眾矢之的，被狠批過去一直無意回應黨內新舊交替嘅強烈呼聲。據了解，過去不足半年內再有多達六名民協區議員退黨，佔民協整體區議員三分之一，主要係不滿阿基落敗後仍然蠢蠢欲動有意復出再參加九龍西補選，阿基再次被炮轟至萬箭穿心，唔知會否順應要求，給予年輕一代「升呢」機會呢？
民協去年立法會選舉一席不保後，本來換上由八十後任正副主席，阿基當時退任中委，以為會有一番新景象，但阿基於選舉落敗後，於人前人後仍然蠢蠢欲動復出，予人感覺該黨始終換湯不換藥。
區議員數目大減三分之一
根據區議會最新資料顯示過去不足半年，最少六名民協區議員前後腳出走，分別係三名九龍城區議員黎廣偉、楊振宇及蕭亮聲；兩名深水埗區議員鄒穎恒及吳美，以及油尖旺區議員林健文，令民協擁有區議員嘅數目，由原本十八人減到最新合共十二人，大幅減少三分之一，當中民協喺九龍城區議會由坐擁三席變成一席都冇。
據了解，有退黨嘅區議員明言不滿民協喺上屆立法會選舉中嘅部署，質疑兩名元老阿基同譚國僑霸佔參選機會，最後敗北收場，整唔見咗民協支「民主棒」。去年底當選民協主席嘅施德來承認，民協失去議席之後，黨內資源大減，對區議員嚟講有好大影響，令唔少人選擇退出，但佢堅稱同退黨嘅區議員喺民主路上無分歧，冀日後可以合作。
同黨友爭出戰九西補選
之不過話雖如此，阿基不言退嘅作風，繼續被黨內批至體無完膚，因應青年新政游蕙禎被政府取消議員資格而引發嘅九龍西補選，阿基最近表明會爭取要求出戰，同民協八十後嘅青年成員，同樣有意出戰補選嘅深水埗區議員何啟明拗手瓜。
何啟明接受查詢時話，民協將會喺下次中委會討論黨內初選安排，又話黨內都明白要交棒，批評有人認為要搶番支棒先再交，惟佢相信，民協目前仍然係民主派於九龍西擁有最多區議員嘅政黨，唔擔心有人離開會影響選舉喎。
何啟明雖然冇指名道姓，但明眼人都知矛頭就係直指阿基，阿基如果繼續無視年輕一代嘅「升呢夢」，加上六名區議員「前後腳」出走控訴不滿，民協再走向分裂，再有區議員出走，相信只係時間嘅問題嘞！