中環出更：梁頌恆赴台播獨 預咗無得再選
青年新政梁頌恆因宣誓辱華被取消立法會議員資格，佢尋日喺台北出席一個論壇時再次「播獨」，聲稱當日走入議會，就係要向世界說明「Hong Kong is not China（香港不是中國）」，又打定輸數預料自己無機會再參選，相信日後再參選嘅話，選舉主任定必將自己踢走。
楊岳橋同出席論壇
梁頌恆、公民黨立法會議員楊岳橋到台北出席一個兩岸三地新領袖論壇，同場有太陽花學運領袖林飛帆等人，梁頌恆喺論壇再次「播獨」，提到去年代替本土民主前線梁天琦參選，目的係走入體制代表港人，向全世界講一句「Hong Kong is not China（香港不是中國）」，佢聲言此舉唔屬於好激烈嘅抗爭，並指如果「香港是中國」，就唔使「一國兩制」。
同場嘅林飛帆就話，一四年太陽花學運發生後，大陸開始反省對台灣嘅政策，同時警醒對香港佔領行動不能手軟。佢又提及，自己及唔少社運人士均無法入境香港，而自銅鑼灣書店事件、黃之鋒去年前赴泰國無法入境事件，加上前民進黨黨工李明哲於大陸被拘留，佢擔心日後會否有台灣人發生同類事件；對於台灣嘅蔡英文總統對李明哲事件遲遲先有表態，楊岳橋更稱蔡英文嘅政府做法，令人覺得有啲似香港政府。
卓妮