政情：忙足一年 陳李妮變出長髮
貪靚嘅女士除咗注重護膚、維持體態外，三千煩惱絲嘅護理都好重要。亞姐冠軍出身嘅博愛醫院永遠顧問陳李妮（Lily）啱啱卸任博愛主席，佢話過去一年忙到完全冇時間去髮廊，咪話Set頭做造型或護髮，就算修剪一下都冇，結果維持咗十幾年嘅掂膊直髮造型，變咗幾乎掂腰嘅長髮，Lily笑稱算係意外驚喜。
高人教「洗頭三部曲」護髮
雖然成年冇護過髮，但係佢嘅髮質睇落都唔錯，唔知有咩貼士呢？Lily笑住分享小秘密，話說多年前佢獲高人指點，將洗頭嘅程序掉番轉，即係先用護髮素，後用洗頭水，而冬天因為天氣乾燥，可以喺用完洗頭水後，再喺髮尾落啲護髮素。
Lily話維持呢個洗頭「三部曲」習慣已有三年，感覺髮絲貼服啲，髮型亦保持得耐啲，加上佢用自家代理嘅有機洗頭水及護髮素，所以頭髮都健康啲。咁趣怪，城中姐妹不妨試吓？