政情：換票論失民心 民主派愈嗌愈褪

戴耀廷遭多次舉報

高等教育界選委、港大法律學院副教授戴耀廷早前呼籲，以提名票作籌碼，以換取下屆特首撤銷覆核四名議員，結果被質疑妨礙司法公正，並遭人多次向廉政公署、選管會等舉報，之後就甚少有人再提出該主張。

不過，「換票論」尋日就好似借屍還魂，因為有多名議員發起聲明，要求政府撤銷司法覆核，獲得一百多名選委聯署，涉及衞生服務界、高等教育界、社會福利界、工程界等等。事件主角之一、議員羅冠聰話，今次四議員被提司法覆核資格並非孤例，擔心政府勝訴後，其他民主派議員或會面對同樣挑戰。議員尹兆堅就批評司法覆核係政治行動，認為浪費法庭資源，係不義手法。

聯署發起人之一、議員朱凱廸就話，特首提名期將於二月中開始，與四名議員嘅審訊近乎同期進行。加上聲明獲多名選委聯署，所以特首選舉候選人都必須清楚回應，政府係咪應該用司法覆核同人大釋法，去傷害立法機構同香港民主，令市民失去民意代表咁話。

佢又解釋稱，當局明顯係以政治理由對立法會進行打壓，今次發出聲明係要求現屆政府喺剩餘半年任期內撤控，停止政治打壓，所以與影響案件嘅公正性無關，不涉及妨礙司法公正。

另外，佢又話對選委提名同投票意向均冇作出集體決定，而係交由選委自行決定，佢自己則唔會投票予對此取態不明嘅候選人。佢又認為，聲明不涉及個人利益，只為保衞香港嘅民主制度，所以認為並非換票。

聯署選委唔夠半數

睇番當日戴耀廷「換票論」一出，連同路人、牽頭組成「民主300PLUS」嘅專業議政都即刻劃清界線，稱「換票論」與佢哋無關。雖然今次聲明較「換票論」溫和，但聯署數目仍然不及民主派選委數目嘅一半，睇嚟大多數人都認為司法覆核案同特首選舉掛鈎並唔可行喎！