政情：積木時計DIY 林筱軒砌出商機
鐘錶行業歷史悠久，後生仔若想做出一番不同凡響嘅鐘錶生意，談何容易？香港品牌總商會常務秘書長徐珊雯嘅兒子林筱軒（Keith）就發揮創意，取得日本一個迷你積木品牌嘅全球授權，用於生產時計、眼鏡等產品。去年仲設計出有專利嘅組裝接合結構，可以用積木砌出個性化嘅手錶及時鐘，創意十足。
點解諗到用積木？咁就要講番興趣先。原來Keith自細都鍾意砌模型，加上爸爸林世康做錶廠三十年，經驗豐富，所以Keith攞到世界最小積木nanoblock品牌授權，用番喺生產鐘錶同眼鏡等產品。Keith話積木時計融入咗原創DIY，件件都唔同，加上積木細，令設計可以好細緻。
玩味十足 吸大細路
做品牌經驗豐富嘅徐珊雯就話，現時鐘錶市場比較淡靜，想闖出一片天並唔係咁容易，之不過積木時計售價唔使一千蚊，又玩味十足，相信喺淡市中可吸引到一班小朋友及有童心嘅大人歡迎。