政情：年宵賣書 鄺俊宇百無禁忌
新正頭人人都貪好意頭，所以新年流流多數人都唔會買書同買鞋，費事「輸輸聲」同「鞋鞋聲」，唔係咁吉利。不過，身兼愛情小說作家兼立法會議員嘅鄺俊宇就無有怕，喺年宵出書，話唔擔心意頭問題而影響銷量，對銷量有信心喎。鄺俊宇真係樂觀喇。
鄺俊宇話，有出版社將佢未正式出版過嘅作品結集成書，唔止有一向寫開嘅愛情散文，仲有佢做咗立法會議員三個月以來處理嘅社會議題，包括引發全城爭議嘅康橋之家性侵事件。鄺俊宇希望佢嘅讀者可以透過呢本書了解社會事件。
講起年宵，鄺俊宇所屬嘅民主黨（白鴿黨）今年年宵將會推出以特首選舉為主題嘅諷刺時弊遊戲套裝，當中包括「魚蝦蟹」、「飛行棋」等遊戲。白鴿黨之前試過內地搵廠家製造諷刺特首梁振英嘅年宵產品，最後被內地海關扣起。佢哋為免重蹈覆轍，今次就將遊戲套裝拆件，安排唔同嘅內地廠家製作。唔知大家買番去時會唔會發現原來係甩皮甩骨呢？