政情：女童遇非禮 陳恒鑌嬲到爆粗
荃灣日前有孌童色魔喺楊屋道一個公園內非禮一名四歲女童，真係聽到都覺得嬲。立法會議員兼荃灣區議員陳恒鑌（Ben）都一樣，因為佢喺facebook分享相關新聞時直認火滾，更寫下「x街xx剷xxxx」，話嬲到要講粗口！
「唔講抒發唔到憤怒」
Ben接受查詢時表示，任何父母見到咁嘅新聞都一定覺得嬲，所以他平時極少講粗口都忍唔住要破戒，仲話唔講粗口都抒發唔到憤怒情緒喎！他仲透露，非禮事件發生在佢嘅區議會選區內，所以尋日落區時，有唔少街坊特別關心同肉緊，希望警方可以盡快拉到疑犯。
雖然Ben好鬼嬲，但佢一啲都唔擔心仔女會遇上同樣情況，因為每次帶仔女出街時，都會將佢哋留喺視線範圍之內。而佢亦都關心其他小朋友，所以語重心長呼籲家長，唔好讓小朋友獨自外出，亦都要時刻保持警覺。
