中環出更：德國統一日酒會邀「分裂」陳浩天
因主張港獨而被拒參選立法會、並揚言要將港獨思潮擴散到中學校園嘅香港民族黨召集人陳浩天，前日喺社交網站上載咗一張佢出席德國統一日慶祝酒會嘅相，並喺貼文中寫︰「當年柏林圍牆倒下，人民重獲自由，願我們亦早日自由。」德國駐港總領事館之前已多次藉着喺社交網站教德文抽港府官員水，今次又邀請主張「分裂國家」嘅港獨人士出席該國嘅「統一」酒會，相當諷刺，莫非係搞搞震搞上癮？
領事館頻頻抽港府水
從相片可見，陳浩天當日身穿筆挺西裝出席德國統一日酒會，並自爆係德國駐港領事館邀請佢去，唔係偷偷潛入去影相。佢仲喺留言預告，「德國佬請我一次都有排煩」，真係有先見之明。
其實德國領事館玩嘢早有前科，上月特首梁振英哽咽咁話政府覓地建屋係「粒粒皆辛苦」，德國領事館就喺社交網站公然教人「辛苦」嘅德文，背景圖片更暗喻「粒粒皆辛苦」，可謂「抽水」力強。究竟德國領事館點解要邀請陳浩天出席酒會？事件會否有下文？相信大家都一定好想知。
卓妮