中環出更：誤聘麻煩家傭名人怕怕
尋日沙田馬場舉行博愛盃賽事，博愛醫院董事局趁機舉行慈善聚餐，為包括興建中嘅全亞洲最大安老院等社會服務籌款。講起安老話題，近日有照顧長者嘅印傭喺網上直播不雅片段，包括自己沖涼同長者如廁嘅情況，引起社會公憤。博愛永遠顧問譚姜美珠（Winnie）就勁呻，佢都啱啱炒咗個做咗長達八年嘅家傭，呢位工人姐姐多年來不停用唔同藉口問佢借錢，已欠咗幾萬蚊，最近竟然夠膽向大耳窿借錢，終於喺大耳窿上門追數前夕同僱主「自首」。Winnie驚嚇之餘果斷即炒，以免夜長夢多。
Winnie話，呢位工人向佢借錢嘅理由多多，包括父母過身、子女結婚、買地起屋等，佢雖然半信半疑，但都好心借畀佢。今次踩到佢嘅忍讓底線，即炒工人之後，屋企冇人幫手，要自己入埋廚房做家務，先發現好多嘢都唔見咗。佢笑笑口話，可能咁多年來珠寶首飾被偷走一、兩件，自己都唔知添！
李鋈發鍾意跑馬做善事
同場仲有博愛主席陳李妮、慈善聚餐籌委會聯席主席李鋈發、副主席吳錦青及香港玉器商會會長羅志光等。李鋈發自言好鍾意跑馬，呼籲大家多啲落注支持馬會做善事，以及幫博愛籌多啲款喎！
觀塘區議會主席陳振彬亦有到場，原來佢同博愛副主席林群係老友。陳振彬話當年佢加入博愛，並唔係由總理做起，而係一入董事局就立即做咗副主席，三年後更坐正做主席，可能係史上最快升做主席嘅博愛人。佢又話，當年有份建立內部規章，依家見到博愛發展得咁好，都覺得好光榮。
卓妮