中環出更：胡穗珊脫俗拒束縛 梳起唔嫁
政壇女將中有唔少都係單身一族，有人不強求姻緣，亦有人姻緣難求，波折重重。其中工黨主席胡穗珊（Suzanne）出身工運團體，曾經做過新婦女協進會計劃統籌，一直都關注婦女議題。佢表明唔會受世俗婚姻制度束縛，所以會作政治表態，由自己出發，將來會梳起唔嫁，寧願只係同居，就算生小朋友都唔會改變主意喎。
Suzanne對梳起唔嫁非常決絕，佢話去年細妹結婚時，佢已經同媽咪講明「今次係你唯一一次嫁女」，所以當晚擺酒，媽咪着咗足足三款衫，叫做補償大女將來唔結婚嘅遺憾喎；而爸爸亦對佢唔結婚無乜意見。不過，Suzanne講到明，梳起唔嫁並非因為佢經歷過不愉快伴侶，或屋企人有離異喎。
麥美娟另有睇法
今年踏入三十六歲嘅Suzanne，同現任工聯會立法會議員麥美娟（Alice）一樣，暫時未有男友，佢話暫時未遇上心儀對象，加上工作好忙，所以都唔急於搵到另一半。問到佢會唔會好似Alice咁要求人哋介紹男仔畀佢認識，Suzanne就大嗌一聲「啋」作回應，估唔到佢同Alice對於姻緣，一個恨一個唔恨喎。
卓妮