中環出更：名人攜手護老盡責無悔
保良局尋日喺啟晴邨舉行「關懷長者心」開展禮，主席郭羅桂珍及丈夫莎莎控股主席郭少明、副主席陳細潔（Abbie）及總理鄧宣宏雁（Emily）等董事局成員都有出席，仲帶埋自己公司嘅義工團齊齊上樓探訪獨居長者。每個人終有老嘅一日，唔知呢班名人有冇諗過老年生活會係點？郭少明夫婦不約而同話未諗過，因為實在太忙。Emily就細數到時會去旅行、畫畫及唱歌等，繼續過精彩人生。
Emily話，佢唔會坐喺屋企等兒子嚟帶佢出去，會安排充實嘅生活。例如佢好喜歡畫畫，依家太忙冇時間畫，老時就可以重拾畫筆。佢亦喜歡唱歌，打算第日喺屋企整間房嚟練吓歌。
陳細潔貢獻護老10載
講講吓，Emily好有感觸話，照顧長者要及時，因為世間無「後悔藥」。早前佢住喺家鄉雲南嘅父親過身，Emily先至醒覺無畀太多時間陪父親，所以依家更加要畀足心機照顧九十幾歲嘅奶奶及七十幾歲嘅媽媽，盡子女責任。
好有長者心嘅仲有Abbie及家姐劉陳小寶，Abbie連續十年出任保良局地區安老服務計劃籌委會主席，絕對唔係玩玩吓，連家姐都忍唔住讚佢。Abbie話，長者為社會貢獻咗大半生，所以一定要關懷及答謝佢哋嘅付出。陳小寶就分享話，曾經探訪一位四年無出過門嘅自閉長者，並帶佢到長者中心，後來呢位長者仲做埋義工。難怪多年來佢一直咁畀心機做長者探訪喇！
卓妮