政情：兩場選戰 港大恐無寧日
近年大專院校嘅人事任命變得政治化，特別係香港大學更風起雲湧，包括副校長任命同中文大學前校長李國章出任港大校務委員會主席風波，都引起一輪抗爭潮。原本以為隨住由心理學系講座教授區潔芳出任學術人力資源副校長後，港大看似回復平靜，但原來只係假象，皆因港大稍後將有兩場選戰，包括校委會委員空缺補選同畢業生議會選舉，睇嚟港大離平靜嘅日子仲有一大段距離。
港大校委會委員文灼非嘅任期將於本月底屆滿，而教育界立法會議員、港大校友關注組召集人葉建源亦已經報名參加校委會選舉！佢話，校委會係港大最高嘅管治機構，任何決策同人事任命都需要經校委會決定，所以校委人選受到關注。佢批評舊年港大出現嘅不正常狀況，擔心會成為常態，所以希望透過參加校委選舉，去排除運作上出現任何不適當嘅干預，令港大恢復尊重制度、變回平靜，亦令大眾對校委會嘅關注度降低。
校董會組成鬆散難拉票
校委會嘅選票將於聽日寄出，六月廿三日中午截止投票，預計當日會有結果。校委係由校董會互選產生，葉建源表示，校董會組成比較鬆散，而且佢唔認識大部分校董，所以選情好難預料，形容可用嘅拉票方法好少，目前只打算用電郵向百幾位校董拉票。據了解，現任畢業生議會常委會成員謝海成已經退選，但葉建源嘅對手仍有皮膚科專科醫生陳衍里、畢業生議會前主席蔡秀煜，睇嚟今次選舉將有一輪惡鬥。
校友關注組想推動修例
除咗校委會選舉，畢業生議會（議會）亦係另一個戰場。港大校友關注組推薦咗六人競逐議會常務委員會成員，其中三名為關注組成員代表，另外三名則係持同樣立場嘅校友，六人角逐八個任期為三年嘅席位，希望能夠開拓其他匯聚同收集校友意見嘅方式、以及根據舊年特別會員大會通過取消特首委任校委會主席同委員權力議案作基礎，去推動修改《香港大學條例》。
關注組又批評，港大目前嘅捐款來源過於單一，會影響院校自主，而長遠需要更高度自主，要喺籌款方面做得更好，所以希望能夠協同其他持份者及校方，去推動港大嘅籌款計劃。關注組對改變港大雄心壯志，但相信另一方都唔會放軟手腳、任由關注組話事，所以今次葉建源等人搶攻港大，港大都幾難平靜喇。