後日係六四事件廿七周年，香港專上學生聯會早前退出支聯會，多間大學學生會決定於六四當日另起爐灶舉行活動，甚至有學界代表報稱要為悼念六四畫上句號，多名學界老鬼發起聯署反擊，話每個人對時局都有不同的判斷和見解，但要有最起碼同理心，似乎暗踩部分學界代表淡化或攻擊悼念六四係冇同理心。
喺六四前夕，學聯成員林耀強、港大校友關注組麥東榮、社民連前主席陶君行、民主黨張賢登等多名學界「老鬼」發起以「悼念，就是抗爭」為題聯署，開宗明義指六四事件對大專學界有舉足輕重影響，係香港學生運動嘅重要里程碑，因此對部分學生組織領袖嚴厲批評並攻擊港人悼念六四難以認同。
聯署又提到，當權者無時無刻想改寫歷史，堅持繼續悼念就是一種抗爭，而香港每年六四維園萬點燭光，就係香港守護良知嘅明證，認為身為香港人需要捍衞自由。
多名學界老鬼突然發起聯署反擊新一代學界代表，會唔會演變成新一次筆戰，大家拭目以待。
卓妮