政情：小肥張做暑期勞工都有補水
近期政府個別部門為鉛水風波疲於奔命，相對較為平靜嘅勞工及福利局局長張建宗（小肥張）尋日仲得閒到去旺角一間中學分享堅毅精神，除咗大談四十多年來嘅公僕生涯，亦透露大學時做暑期工嘅經驗，竟然放棄做政府實習生，走去做工廠雜工。講到咁堅毅咁刻苦，但其實間工廠係有津貼及超時補水，叫做辛苦都有成果，但換轉時下工人又係咪出咗半斤力，就可以攞番足八両呢？
工資拍得住政府實習生
一九七二年大學畢業嘅小肥張話，當年嘅大學生都希望做政府實習生，皆因人工高、工時短。但佢無申請，反而選擇去做薪金低一大半嘅工廠雜工，日薪只得十二元，更形容嗰段時間為人生最辛苦嘅三個月。佢之後解釋，當工廠工人能夠體驗勞動、深入基層生活，亦有助明白生活艱苦，自言短短三個月嘅工廠經驗能夠畢生受用，以勞動了解人生。
小肥張大談工廠經驗非常動聽，但佢辛苦係有回報，因為工廠有津貼及超時補水，所以工資拍得住政府實習生。連四十多年前都已經有津貼及超時補水，奈何今日社會仍就有關議題爭議不斷，作為勞福局局長會唔會感到慚愧呢？