政情：八網難逃：史泰祖行街 「執」到寶

醫學會會長史泰祖喺社交網站上載一個精緻嘅木櫃，話自己喺街上執到，唔通真係周街執到寶？史泰祖話，呢個樟木櫃係北角區一個相熟嘅收買佬，以一千蚊賣畀佢，自言呢種舊式手工花紋，幾乎已經搵唔番，因此非常鍾意，冇諗過自己有冇買貴咗！史泰祖打算拎返屋企髹油同修補吓，之後就會擺喺自己間村屋，襯番村屋內嘅樟木茶几，佢又大讚樟木好，因為唔使防潮，非常襟用，樟木味仲會令到全屋都冇蟲，如果放衫入去，啲衫永遠都唔會爛喎！