- on.cc 東方互動主頁
- 4月27日 (日)
正值多事之秋嘅新界鄉議局，對外有「套丁」案爭議，對內再有領導層入院！繼鄉議局前主席劉皇發（發叔）去年疑因病重入院，至今仍然缺席所有公開場合及會議，原來鄉議局副主席兼行政會議成員張學明上星期亦因為急性膽囊炎，需要入院進行割膽手術。
上周有網媒報道指張學明早年涉嫌套丁圖利，佢事後更罕有缺席鄉議局上周二嘅大會，未有現身主持會議，令套丁謠言更甚囂塵上。不過，卓妮聽聞張學明唔係有意避開傳媒，係因為前一日突然腹部絞痛要送院檢查，先發現原來生膽石。張學明尋日喺電話向卓妮證實，上周一腹部突然劇痛，檢查後發現「個膽好多石」引發膽囊炎，需要進行割膽手術，尋日下午先正式出院，所以無奈缺席上周二鄉議局會議及前日行政會議。
卓妮喺電話聽到張學明講嘢仍然氣若游絲，相信佢仍然需要一段時間休養。其實佢已經向鄉議局請假，直至下月十五日，即年初八，所以可能出席唔到年初七（人日）鄉議局團拜及沙田馬場鄉議局盃賽。
農曆新年將至，發叔往年嘅大年初二都會到沙田車公廟為香港祈福，睇怕今年接棒負責求籤嘅鄉議局主席劉業強都要為局方上下多多祈福至得喇！
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
