政情：分享 整回族年糕 馬廖千睿焗足三日
農曆新年將至，年糕、蘿蔔糕等各式糕點已成為過年必備嘅食品，不過呢啲糕點多數係蒸嘅，港區人大代表馬豪輝太太馬廖千睿（Elaine）尋日分享一款回族特色甜品「焗椰汁年糕」，夠晒有新意。
梅韋祖蒂炮製「元寶」賀歲
地中海貧血兒童基金（基金）尋日搞咗個慈善烹飪班，搵到Elaine教大家煮應節佳餚，佢透露廿幾年前有回族朋友送焗椰汁年糕畀奶奶，佢食咗之後十分鍾意，所以就開始學整，唔少朋友食過都讚不絕口，所以佢過年至少要整二百底送畀朋友，整足三日！
基金董事梅韋祖蒂（Judy）煮嘢食都有心得，佢話過年時除咗準備應節廣東餸之外，佢必整一款叫做「元寶」嘅蛋餃，寓意盆滿缽滿。Judy話，呢款係家鄉江蘇過年時必食嘅嘢，細個時媽媽一定會準備，所以佢都將呢個習俗延續落去。