黃俊皓最想球迷記得我！

「13號黃慶燁喺後防踢得幾好，連費蘭度都畀佢爆番轉頭。」香港飛馬早前在聯賽不敵傑志，「13號仔」仍在球會facebook專頁獲得球迷點名稱讚，不過他的正確名字叫黃俊皓。「哈哈，好彩後尾改番。其實飛馬門將叫袁皓俊，夢想駿其左閘叫黃梓浩，我哋經常畀人撈亂。」阿皓不怒反笑。與紅遍全港的葉鴻輝同年出生，自幼已在青年隊老友鬼鬼，阿皓的起跑線卻比「英雄輝」及其他同齡隊友遲來半步。「阿輝、阿孝（曾至孝）及(O靚)仔（談樂軒）一齊踢甲組華家堡，我就隨香港C隊踢預備組。大部分隊友都畀甲組球隊選拔，我就要敲門試腳。」

亮相甲組首兩季，效力的淦源及愉園雖降班收場，但阿皓逐漸穩站正選，無奈踢法實而不華缺少光芒。在知足與不甘之間，往往最難熬；「如果踢得差冇人要，索性死咗條心轉行。但明明有得踢，踢成點都冇乜人留意，其實仲難受。有時都同黃威講笑，點解你受傷冇得踢，大家依然搵你簽名訪問，但冇人搵我？」笑聲背後難分真假「葡萄」。與其埋怨，不如自我鞭策，阿皓深明此道：「一係唔好踢，一係再勤力啲，畀大家發現我嘅存在。飛馬今季要兩閘多上前助攻，我就唔理傳球係咪到位，放膽衝上去。」

要叻畀女友兼父母睇

省港盃替補入圍，他的名字終被球迷記起––犯規輸掉12碼，卻沒有多少人記得，老友談樂軒的入球，也是來自他的右路策動。「呢場表現唔合格，太緊張喇。港隊踢大賽正選唔輪到我，但就算係做替補第3人都要努力爭取。」阿皓直言曾想過一、兩年後再無突破便抽身而退，如今卻堅定方向：「放棄比留低要更大勇氣，踢波始終係自己最鍾意，點會捨得？」人生是場長途賽，未到終點難知結局，更何況沿途有她：「女朋友與父母差不多每場也入場支持，我都好想畀啲成績佢哋睇。」記住他，他叫黃俊皓。

文：Kaka

圖： 司徒子文