政情：新思維 想搵大水喉
由多名民主黨（白鴿黨）前成員另起爐灶成立嘅政黨新思維，鐵定於明年一月七日舉行籌款晚宴暨成立典禮，傳聞已經有不少政商界人士「科水」買枱支持，相信足以應付新思維未來一年經費。錢財就已經有着落，人才方面亦聽聞新思維正力邀建制派立法會議員林大輝及新民黨前副主席鄭承隆加入，如果洽談成功，該黨變相多咗兩條「大水喉」人才射住，將成為傳統泛民主派及建制派嘅勁敵。
由白鴿黨前成員狄志遠及黃成智牽頭成立嘅新思維，雖然話要走「第三道路」，但大部分成員都係白鴿黨舊人，所以組黨至今仍然未能擺脫白鴿黨嘅影子。有傳狄志遠近月積極向新面孔招手，曾任仁濟醫院主席及新民黨副主席嘅鄭承隆係頭號對象。鄭承認狄志遠好「有誠意」同佢洽談過，但暫時未正式加入。
倘鄭入黨 30人或隨過檔
有消息指出，如果鄭承隆成功入黨，將會有約三十個新民黨現任或前任成員跟隨加入新思維，傳聞包括已退出新民黨嘅葵青區議員張慧晶及前中國小姐香港賽區冠軍趙哲妤等。
由於新思維打算未來傾向行選舉導向，有分量嘅政治人物係該黨主要目標，其中廠商會代表林大輝，一向敢於批評政府，聽聞亦係佢哋嘅洽談對象。不過，新思維始終係新政黨，所以大輝對於加入都有不少顧慮。其實一連串嘅招兵行動，都係為咗選舉做好準備，之前表明會積極考慮派人出戰立法會新東補選，亦有傳係由前立法會議員黃成智出戰，為明年九月換屆選舉試票。
驚爭新東被當鎅泛民票
不過，新思維近日反而對新界東補選大吹淡風，聲言擔心出選會被認為係向泛民「界刂」票，形象負面會破壞喺明年九月出選立法會換屆選舉嘅最終目標。其實走中間路線或「第三道路」，早已被定性偏向建制派，如今仲邀請有建制派背景人士加入，更加水洗唔清，點解仲擔心參加補選被視為向泛民鎅票呢？