中環出更：高官當黑 波叔跳繩扽親
政府高官呢期認真黑開有條路，繼食物及衞生局局長高永文上周出席長跑比賽時，出師不利甫開跑即仆到血流披面，要縫針收場後，發展局局長陳茂波（波叔）尋日同中學生跳大繩時亦不慎絆倒跌親個「八月十五」，在場學生目睹波叔「扽」親屁股仲笑晒拍爛手掌，難得波叔笑得燦爛，再接再厲。
波叔尋日到港九潮州公會中學同學生分享運動中嘅堅毅。佢自言年輕時咩球類活動都啱玩，只係多年前當選立法會會計界議員後太忙，惟有自己練跑。波叔之後同香港跳繩代表隊成員一齊跳大繩，幾十年冇跳繩嘅波叔明顯跟唔上年輕人節奏，一開始已經幾乎跌低，其後由外面入繩更加即時被絆倒，跌到四腳朝天，身旁學生立即扶起佢，好彩波叔冇事，企番起身再跳過，果然表現運動中嘅堅毅。
自爆曾鬧到個仔離家出走
波叔又同學生分享佢同兒子陳天行嘅相處點滴，仲自爆二人曾經吵大鑊添！波叔回想有次埋怨天行掛住打機唔陪佢跑步而鬧交，天行仲嬲到一度離家出走，結果天行第二日返屋企後，原本諗住好好「修理」兒子嘅波叔即時心軟，走埋去攬實天行，天行事後解釋當時正為美國升學煩惱，打機只係想輕鬆吓。波叔笑言父母同仔女冇隔夜仇，但雙方了解都好重要。
卓妮