政情：乳鴿搬垃圾佔領食署
民主黨（白鴿黨）激進「乳鴿」中西區區議員許智峯（峯鴿）去年佔領區議會被保安一「抬」成名，最終要守行為一年，未知是否擔心再發動佔領行動會再惹官非，今早佢同黨友兼同區候任區議員吳兆康行動時，就以垃圾代替自己「佔領」食物環境衞生署中西區辦事處！
峯鴿日前在社交網站自白，稱主張「非暴力直接行動」理念及「斯文」抗爭，又自稱「不求鎂光燈」。不過，「中區孖寶」峯鴿與吳兆康今早就喺社交網站貼文，話中環、半山區餐廳酒吧夜間違法傾倒垃圾問題嚴重，影響該區衞生，二人凌晨到酒吧區執起部分垃圾，突擊直搗食環署位於上環市政大廈嘅辦事處抗議，迫使署方「面對」問題。
冇被票控 反獲署方感謝
不過，人人都知亂拋垃圾定額罰款千五元，呢對孖寶豈不知法犯法？吳兆康話，佢哋不但未有被票控，更引述署方代表感謝佢哋嘅意見，承諾會想辦法解決蘇豪區垃圾堆積問題，方案包括派出通宵巡邏隊。其實表達意見有好多方式，如果下下靠打橫嚟爭取，咁仲使開區議會嘅？