探射燈：商場舖吉鬥吉 小店愁撐唔過聖誕
旺區商場舖八千蚊全包都冇人租？聖誕將至，原為零售旺季，惟近年市道慘淡，銅尖旺商場人流愈見稀疏，吉舖湧現。近日有部分商場自願減租，但商戶仍紛紛離場，有銅鑼灣的商場業主更大幅減租七成，舊租戶卻寧願轉為網上商店或樓上舖；有商場變招，推共同賣廣告或將劏舖改做Cafe吸客，不過反應亦一般。業界人士指，部分商戶生意明顯轉差，只勉強開門做生意，希望在聖誕及新年帶動下，可力挽狂瀾，否則過年後將觸發另一輪執笠潮。
「八千蚊全包，叫我哋啲舊租戶返去，比以前二萬幾蚊一個月租金係好抵，但都冇人願意返去啦。」於銅鑼灣一個商場開店近兩年的Cyrena，今年七月因商場人流稀疏，決定由商場搬至附近的商住大廈，「銅鑼灣商場年頭開始已經冇walk in客，愈開愈晏，又愈來愈早收舖，只係依靠熟客維持收入。」她提到，以往開店時間由下午二時至晚上十時，「慢慢變成四點先開，八點幾就收舖，晚飯之後完全冇人行街，開嚟都冇用。」
現場所見，一個位於銅鑼灣樓高兩層、約有一百六十個舖位的商場，竟有約六十間店舖人去樓空。Cyrena指，同場店舖不少已結業，轉為樓上舖或只做網上生意，「商場開價係好吸引，但大家傾過，都無諗住返去，重新裝修要用成五萬蚊，更加唔擔保人流會唔會好番，好多客話依家商場冇嘢睇，都冇再去啦。」她坦言，現時租金近兩萬元，但新店面積比以往大一倍，並與另一店舖夾份租用，「依家好多顧客轉為網上購物，每日係社交網站落廣告嘅錢都唔少，吸多啲生客，喺呢個時勢呢啲錢真係唔慳得。」
「一個月先有一個生客」
面對零售寒冬，近日至少有六個旺區商場傳出減租，但續租情況未如理想；有商場亦不惜變招大搞宣傳望增人流，但並非所有商戶響應，反應一般。位於尖沙咀彌敦道的一個商場有過百商戶，但真正租出的只有一半，即使成功出租的舖位，在平日傍晚更有一半未有開店，商場內顧客十人也不足，開設美甲店的Becky坦言，「好多舖頭都執晒，呢間開業，隔籬就執笠，冇人做得長。」她雖未獲商場減租，但商場推出共同賣廣告的宣傳策略，「我自己就冇參加，覺得冇乜用，而且又要花一筆錢，人流係咪會多咗又唔知。」
「呢個場walk in客一直都好少，自己就一個月先有一個生客，靠熟客賺錢。」她提到，不少店舖都是有預約才會回來開店，平常不會開，無店可行，人流便愈來愈少，造成惡性循環。
搬舖減租無助吸人流
而銅鑼灣另一商場的頂層十多個舖位亦只餘下約六店開業，放工時分亦只有兩、三名顧客上頂層逛逛。在該商場開衣飾店的東主陳小姐坦言，自年初人流漸少，商場一、二樓原本也有不少吉舖，商場管理處曾作出調動，把頂層的店舖遷移到一、二樓，而頂層則向商戶減租留人，寄望可改善現時「死場」的情況，「商場都平咗我四、五千蚊租金，商場亦將頂層其中幾個舖位改做Cafe，希望將來人流會多番啲。」惟陳亦提到，「好耐先有生客，依家都係靠熟客支持，一有新貨都會send畀佢哋睇。」
香港百貨商業僱員總會副理事長鄧祥勝表示，不少商戶仍處於觀望態度，「商戶都想睇吓可唔可以搵埋聖誕同新年嘅生意，不過，過完年可能會更差，迎來另一次執笠潮！」他指，旺區商戶受到嘅影響最大，「自由行區域嘅商戶普遍市道都好差，好多都係勉強捱緊，希望過到年。」
圖／文：專案組