政改甩轆事件後，建制派內訌不斷，矛頭直指經民聯。據知唔少建制政黨都借機就甩轆事件向操盤人告經民聯一狀，冀在十一月區議會選舉搶走經民聯地盤，一鋪打散經民聯。
早幾個月傳出自由黨成員李梓敬成功同經民聯成員兼深水埗區議會主席郭振華協調，郭振華會讓路又一村選區。不過，有地區人士爆料，郭振華嘅橫額近日再現又一村，似乎打算同李梓敬硬撼，就連同區區議員都改口風話無聽過郭振華要退落嚟。
有傳自由黨係用立法會功能界別議席同郭振華交換，李梓敬就矢口否認，坦言該黨喺工總勢力大不如前，無可能開出以上條件。照咁睇，有機會係該黨想起經民聯尾注，反口唔認數，令郭振華逼住再棟支旗出嚟參選。
類似「反口」情況喺其他區都有發生，本身係委任議員嘅葵青區議會主席方平，本來計劃接手獨立建制派議員譚惠珍嘅安灝選區議席，但近日傳出有民調顯示方嘅支持度不足，所以譚有機會再選一屆，而方嘅區議會生涯就要拜拜。不過，方就話冇聽過有關民調，強調會積極考慮參選。究竟建制派係唔係想喺區選一鋪打散經民聯，去到十一月選舉就會知曉。