政情：孫女屬馬 胡曉明喜如願
城市大學校董會主席胡曉明（Herman）早前出席城大活動，滿面笑容，心情極靚。原來佢啱啱去完美國探半歲大嘅孫女，而且仲係第一次抱孫，難怪咁開心嘞！小孫女叫胡雅茵（Isla），係中美混血兒，因為媽媽有蘇格蘭血統，所以都改咗Isla呢個蘇格蘭名，有小島嘅意思。至於孫女個中文名，Herman都無多加意見，留番畀兒子決定。
小孫女目前留美居住，等多三年，Herman大仔正德完成心理學博士學位，就全家齊齊返香港。正德未讀完書就做爸爸，背後原來有段古。話說正德當年想繼續升學，Herman就話無所謂，但一定要生個屬馬嘅孫畀佢。當年正德都未拍拖，但竟然趕得切生個馬女，Herman都笑正德守諾言。Herman又透露自己屬馬，今年啱啱相隔一個甲子，比孫女年長六十歲，難怪有個咁特別要求。