中環出更：內地交流團繁多 搶客爭崩頭
放暑假除咗去旅行同做功課，唔少學生都會搵機會離港交流同實習，當中內地係熱門之選。不過，近年有好多團體都相繼舉辦同類型活動，目的地亦大同小異。香港傑出青年協會今年亦有份舉辦北京交流團，協會主席甄韋喬（Mickey）透露，呢類內地交流活動早幾年就吃香，但現時選擇比以前多好多，想吸引學生參加交流團唔係一件易事，意思即係團體之間爭客都爭崩頭。
參加學生不及以往踴躍
傑出青年協會早前舉辦明日領袖高峰論壇「『劃』出明日彩虹」活動，Mickey話協會今年搞嘅北京交流團反應麻麻，學生明顯冇過往咁踴躍，可能係同近年籌辦內地交流團增多有關，分薄咗有興趣報名嘅學生人數。此外，現時除咗北京、上海等大城市外，幾乎各個省份都有交流團，啲學生去過一個地方之後，翌年就會選擇其他地方，所以即使佢哋出錢出力搞青年活動，喺面對咁多競爭嘅情況下，都要絞盡腦汁先吸引到班學生。
當日出席嘅仲有協會秘書長余嫿、菁英會前主席梁宏正及互聯網專業協會會長洪為民等人。講起個仔放暑假，洪為民就話早前同個仔食早餐時傾過將來想讀咩科目及工作等問題，佢話個仔有諗過讀法律，所以佢就搵咗個律師朋友同阿仔傾吓偈，分享有關經驗。
至於近期爆出食水含鉛問題，洪為民就話自己住嘅唔係新落成樓宇，加上佢屋企亦有裝濾水器，所以唔太擔心。相反身旁嘅梁宏正家中就冇安裝濾水器，依家見咁嘅情況，都考慮緊裝唔裝好，打算睇吓身邊啲朋友用成點先，而佢都有朋友售賣相關產品，會開始留意同格吓價喎。
卓妮