中環出更：坐定等拉 貪曾婉拒出席閱兵
「貪曾」前特首曾蔭權爵士二○一二年卸任前被揭發「貪盡海陸空、歎盡省港澳」貪腐醜行，最終被廉政公署調查。
已缺席七一酒會
刑事檢控專員楊家雄六月下旬就話三個月內就會決定係咪檢控貪曾，換言之最遲九月下旬就有分曉，而楊家雄仲話貪曾作為前特首唔會「走咗佬」。面對隨時落鑊，一向有著數就舔到盡嘅貪曾近期似乎已減少蒲頭，聞說下月三日抗戰勝利紀念日嘅天安門閱兵佢都婉拒出席，唔通佢真係匿喺屋企坐定定喺度等拉？
貪曾上月已經缺席咗今年七．一香港回歸十八周年酒會，有報道話，今年九月三日喺北京天安門舉行嘅閱兵儀式，官方都有邀請貪曾，但貪曾就婉拒咗。我哋有問過特首辦係唔係有邀請貪曾出席，特首辦就話閱兵儀式嘅嘉賓名單依然準備中，遲吓會公布喎。卓妮亦問過前特首辦公室，貪曾係咪唔去睇閱兵、理由係咩？不過，對方就未有回覆。
今次喺天安門舉行嘅閱兵儀式係為咗紀念抗戰勝利，貪曾貪腐醜聞纏身，如果佢有自知之明都應該明白出席有辱國體，邀請貪曾嗰個就更加唔知點諗嘢喇。
卓妮