政情：政改甩轆 「元兇」自由黨

田少屢譏諷其他建制派

一個月前嘅世紀大甩轆事件，源於林健鋒及葉國謙為咗等候劉皇發（發叔）趕返立法會投票，臨急發起拉隊離場行動，希望令會議因不足法定人數而暫停。但係一向「離群」嘅自由黨五名議員冇離場，工聯會陳婉嫻、保險界陳健波及廠商會林大輝見狀亦決定留低，令會議廳維持足夠法定人數，最終政改方案好意外咁喺八票贊成、廿八票反對下，大比數被否決。

事發後曾有建制派提出，若自由黨等人肯跟大隊離場就唔會甩轆。但自由黨田北俊及林大輝則反責離場議員無事先做好溝通，堅稱留低投票先至正確，並自爆有中聯辦官員來電表揚。其中田北俊更多次喺社交網站譏諷其他建制派係「豬」及「人蠢無藥醫」。

不過，消息指負責港澳事務嘅北京官員並唔認同上述結論。由於政改甩轆茲事體大，北京事後要求部分本港愛國團體及單位就事件提交報告，最終結論有二：一係將甩轆定性為技術性錯誤，事關政改遭否決嘅結局一早已知，特區政府及冇投票嘅建制派都毋須太自責；二係北京認為表決甩轆與其後嘅建制派WhatsApp外洩事件，凸顯建制派唔夠團結，各黨派與獨立議員存在深層次矛盾，必須正視及糾正。

有倒戈前科 劣迹斑斑

有京官認為，離場建制派為求「等埋發叔」，令支持政改票數「一票都不能少」，即使做法愚蠢，但總算係體現團結，林健鋒及葉國謙等甩轆「罪人」有望「平反」。反觀自由黨帶頭拒絕離場，事後又對其他同僚冷嘲熱諷，先係唔團結嘅表現。尤其自由黨曾在《基本法》廿三條一役倒戈、田北俊又喺佔領敏感時刻公開要求特首梁振英下台擾亂軍心，對北京而言可謂劣迹斑斑。

據聞有關「定調」一出，有曾因為留在會議廳投票而獲讚嘅建制派議員深表憤怒，甚至聲言今後與有關人士講電話要錄音留底喎！