做男人最緊要夠豪氣，飲酒要夠豪，講說話要夠氣，陰聲細氣咁又點可以凸顯雄風，令身邊嘅女仔傾慕呢？而女仔夠豪氣亦顯得相當有性格，好似吉川友咁好酒量，吸引力同樣令廣大麻甩佬着迷。
好索呀！真係好索呀！我話好索並非氣味，而係用肉眼品嘗嘅氣質。呢種咁索嘅氣質唔係來自模特兒，亦唔係女演員，而係一位正活躍於樂壇同寫真界嘅極品美人吉川友。欣賞咗咁多年日本寫真，見過不知幾多優質寫真女郎，近幾年令小弟我印象深刻嘅有唔少，好似杉原杏璃、吉木莉沙、花木衣世等都風格出眾，但係吉川友可以話係我最鍾意嘅其中一位。23歲嘅吉川友少女味唔濃，姊系感覺則比較重，予人一種溫柔婉約之感。同時吉川友形象鮮明，露出一派柔情似水，情深款款表情嘅時候，真係令人暈得一陣陣，呢種難得嘅氣質相信大家一定無法抗拒。吉川友身材同樣誘人，膚肌呈鮮嫩嘅粉紅色，同時應大則大，應幼則幼，飽滿嘅上圍仲斤両十足，係咪超索先？
吉川友喺2006年參加早安少女組第八期面試，一心諗住成為偶像歌手，之但係面試失敗，幸而經過一番努力練習表演技巧，終於成功加入另一個美少女團隊Hello! Project。隨住團隊發展，得到好多幕前演出機會，仲主演過電影《契機是YOU！》，對於一位年輕歌手嚟講發展算唔錯。到2011年，吉川友先後同其他美少女合組小型隊伍之後，決定單飛發展歌唱事業，同一時間更頻密地拍寫真，向廣大觀眾展露其誘人胴體。吉川友嘅歌聲被認為夠甜美亦夠穿透力，今年推出新歌《花》仲顯得友妹夠晒中氣，因為首歌有成17分25秒咁長，氣量稍稍不足都唱唔晒啦。友妹除咗唱得仲飲得，近期演出綜藝節目《乾杯戰士After5》，當中五位主持都以特撮劇集嘅戰隊成員打扮四圍飲飲食食，友妹就係隊中嘅粉紅戰士，拍攝期間經常同戰友乾杯，每次都杯杯清，酒量令人佩服！
吉川友經常於博客透露生活細節，想了解更多有關佢嘅生活習慣，可以Click上去睇。
網址：http://ameblo.jp/kikkawa-you/
年齡：23歲
身高：5呎4吋
三圍：34E-23-34
撰文：賢