工程延誤復拉布 票債票償是出路

俗語話,洗濕個頭,意思即係騎虎難下,焗住收拾殘局。香港基建工程甩甩漏漏,無一不延誤,無一不超支,就係洗濕個頭嘅典型例子,家陣唔上唔落,繼續落去固然唔掂,半途而廢更加唔掂。

嗱,港珠澳大橋就係其中一個樣辦嘞。由於工程延誤導致建造成本激增,港珠澳大橋港方口岸嘅最新造價達到三百五十八億元,超支五十四億元,立法會工務小組日前討論有關追加撥款申請,反對派議員大興問罪之師,炮聲隆隆。有人批評工程淪為大白象,有人要求縮減工程規模,有人甚至以不滿當局未能清楚交代大橋最終造價及完工時間為由提出中止待續議案,結果喺反對派人多勢眾之下,議案獲得通過。

即係咁,港珠澳大橋爆出延誤及超支醜聞,港府難辭其咎,立法會追究責任,當然唔係問題,問題係大橋工程已經嚴重滯後,家陣追加撥款被硬生生煞停,唔通真係任由工程爛尾?唔通將來以「半橋」通車?反對派狙擊港府還狙擊港府,唔應該搵港珠澳大橋做籌碼,一旦大橋真係爛尾,唔止香港形象掃地,投入嘅公帑更加付諸流水,最終受害嘅咪又係普羅市民。事實上,大橋追加撥款受阻,工程勢必進一步延誤,造價勢必進一步超支,通車勢必進一步推遲,政客為做政治騷,不惜攞納稅人嘅血汗錢較飛,何止無良,簡直靠害。

講到尾,政客私心自重,佢哋聲稱為公帑把關,根本就係偽善。最簡單,點解港珠澳大橋工程會一拖再拖吖?咪因為反對派當年教唆市民挑戰大橋環評報告打官司囉,結果導致工程推遲超過一年,損失公帑六十五億元,呢筆混帳咁經典,反對派唔通咁快就忘記咗?最諷刺嘅係,今日狙擊大橋追加撥款嘅議員,正正就係當年官司幕後黑手嘅黨友,所以話啫,港珠澳大橋搞到唔上唔落半天吊,反對派先至係始作俑者!

香港真係好慘,港府已經無能透頂,立法會又烏煙瘴氣,想唔沉淪都難。港珠澳大橋一波三折,不過係行政立法惡鬥嘅其中一件犧牲品咋,呢,由於立法會拉布成災,二○一三至一四立法年度財委會批准撥款嘅新工程項目只得十三項咁大把,比前一個年度嘅三十九項大減近七成,問你服未。香港經濟轉型一籌莫展,工程基建落後於人,競爭力有乜可能唔每況愈下吖?

基建工程洗濕個頭,市民無可奈何,只能夠硬住頭皮撐落去,但係選民意代表就唔同嘞,對嗰啲有破壞、冇建設嘅無良政客,大家唔使猶豫,為咗拯救香港,一於用選票將佢哋掃地出門喇!