中環出更：囝囝就職會長 何承天打氣
香港青年團體多不勝數，每年換屆就職頻繁，日前就輪到蘇港青年交流促進會舉行就職禮，立法會前議員何承天兒子何宇磯擔任會長。宇磯嘅媽媽係江蘇人，所以宇磯計落算係半個江蘇同鄉。不過，到場打氣嘅係佢爸爸何承天。何承天從政經驗豐富，如今輪到囝囝活躍於社團界，唔知有無過番兩招畀兒子呢？
講番個會，主席之位由國際青年商會香港總會前會長關俊華（Johnny）擔任。
遊客減 羅詠詩照買酒店
Johnny透露上任後大計多多，今年七月中將安排三十五位大學生到南京及江蘇企業做暑期工，當中包括金融及文化機構，聽落應該係大開眼界嘅好機會。除咗實習，Johnny又計劃發動年輕人扶助內地偏遠縣市嘅貧困及殘障兒童。
環顧亞洲區，香港新一代發展機遇算唔錯，好似百仁基金副主席羅詠詩，早前喺北角購入精品酒店，正在裝修。雖然近期內地遊客大減，但佢依然信心十足，寄望市道好快回暖。至於香港鐘表業總會當年顧問高鼎國，幾年前已開拓東南亞如泰國、韓國及馬來西亞等嘅鐘錶市場，分散投資，所以即使香港零售市況轉差，對生意亦影響不大。
不過，協成行董事總經理方文雄就關注香港競爭力正在下跌中，佢慨嘆立法會部分政客經常「拉布」，令大型基建項目一拖再拖，加上建築成本不斷上漲，損失隨時數以十億元計，呼籲政客以大局為重，盡快將死結解開。
卓妮