一年一度由支聯會主辦嘅六四晚會周四舉行，但今年泛民主派陣營大分裂，原本係學聯成員嘅香港大學及浸會大學學生會都有意另起爐灶搞晚會；加上去年已經喺尖沙咀文化中心舉辦活動嘅熱血公民，令六四晚會史無前例鬧四胞胎。雖然支聯會嘅晚會先係老牌，但今年嘅參加者可能買少見少。今次真係學聯失勢拖累支聯會，而支聯會嘅理念又係本土派搞退聯嘅其中一個原因，真係累鬥累。
學聯早前爆出退聯潮之後，聲勢已大不如前，早前佢哋發聲明，話唔會用學聯名義參加六四晚會，但各大學學生會代表會自行決定是否參加。雖然中大、嶺南、科大及樹仁四間大學嘅代表透露會參加六四晚會，但早前港大學生會已話明唔參加，自辦悼念活動，同樣退聯嘅浸大都係咁諗；加上熱血公民事先聲明繼續自辦晚會，因此周四晚最少有四個同類活動。
俗語有話「多隻香爐多隻鬼」，同類晚會愈搞愈多，一定會分薄支持者。而出席者少，籌款數目難多，連鎖效應真係唔到你唔驚。講嚟講去，專上學界大分裂係支聯會困局嘅源頭，但呢波分裂潮中，學聯因去年領導佔領行動失敗需要負責，而支聯會嘅負責人喺佔領行動上又有關鍵角色，所以講係互相連累。