政情：建制 泛民面目模糊
佔領行動後衍生出來嘅「傘兵」，呢幾個月都成立咗十幾個以地區做牌頭嘅組織，全部喺社交網站有晒專頁，例如青年新政、乜乜動力、乜乜網絡等，打正獨立派別旗幟，專門用來收集區內所有民生議題，隨時準備參加年底區議會選舉。據聞建制派感到呢類泛民組織會帶來威脅，近月都跟風成立唔少「去政黨化」嘅地區專頁，以制衡泛民。依家泛民及建制派都用埋同一種招數，搞到普通市民都好難分辨。
自從佔領行動結束後，好多傘兵都話要落區「深耕細作」，甚至以選舉方式進入建制，改變社區，之後呢班青年人就各自喺網上成立咗十幾個地區組織，可以話全港十八區都有。由於呢啲網上專頁少談政治，多談民生，例如講吓巴士站蓋滴水、有坑渠塞咗、馬路路陷等等，成功吸引到唔少街坊留言，成為呢班傘兵收集民情嘅最佳渠道。
主打民生議題
據聞建制陣營迅速有樣學樣，經我哋明查暗訪後，發現網上好多新成立嘅社區組織專頁，例如「啟德晴朗會」、「秀茂坪青年團」、「將軍焦點」、「東區頻道」、「東區新動力」及「南區觸覺」等，清一色只講區內民生議題，但撳入去專頁就會發現，絕大部分「讚好」嘅人士，不約而同都係來自建制派政黨，分別係民建聯、新民黨及自由黨，睇嚟呢啲組織同建制派政黨都有好緊密嘅聯繫喎。
居民報料渠道
有建制派人士透露，佢哋發現呢類地區專頁成效極佳，由於不分黨派，地區內一旦有咩突發事情，例如早前黑色暴雨時，邊度有水浸，居民都可以透過呢啲專頁「報料」，咁服務當區嘅社區主任就可以第一時間趕到現場。除咗專注地區組織，仲有一大堆針對單一民生議題嘅專頁，都係近年先突然活躍，背後由政黨操控，目的都係想吸引不同政治光譜嘅市民讚好。
至於點解建制派同泛民都刻意「去政黨化」？有政界中人就分析，佔領行動過後產生黃絲及藍絲兩大陣營，但其實仲有好多市民唔想捲入政治爭拗，如果政黨想喺區議會選舉搶奪中間派票源，一定要減輕政黨味道先有運行。