中環出更：疏導內地客 趙振國「訂」妙計
復活節假期開始，日本因為日圓貶值而成為港人外遊熱點。經常到日本玩嘅香港品牌總商會（商會）會長趙振國（CK）話，本港反內地旅客情緒高漲，嚇怕唔少訪港內地團，佢認為港府應帶頭統籌、疏導內地旅客，不妨倣效日本為旅客提供預訂貨品服務，減少旅客一窩蜂湧到鬧市嘅做法。
商會早前舉行春茗，多位城中企業家齊聚頭，包括香港工業總會前主席鍾志平（Roy）、香港鐘表業總會前主席黃業光、中華廠商聯合會常董陳國民等人。講起反水客事件，CK批評部分激進港人係「開倒車」，政府部門又欠部署，搞到怨聲載道。佢以新春遊日本四國嘅經驗為例，雖然訪日遊客大增，但遊客區並冇出現逼爆場面，皆因疏導有方。佢話通常旅行社事先會問旅客想買乜，及早幫手預訂後送去酒店，咁既可提高購物效益，又可防止旅客一窩蜂湧去購物區，值得香港倣效吓。
望港人多包容體諒
黃業光就好關注針對內地旅客示威，望港人多包容體諒。阿Roy認為，香港應加強與珠海及深圳嘅聯繫，共同發展區域經濟合作。咁啱搞緊邊境購物城嘅立法會議員黃定光都有到場，唔知CK有冇趁機叫佢搞多幾個購物城，咁內地遊客咪唔使通街走囉！
商會副會長鄭陳曼芝話，已獲政府撥款三百多萬港元協助宣傳香江品牌，年底將喺上海舉行展覽，展期長達一年，預計有三十至五十個香港品牌受惠。
卓妮