中環出更：建制80後孖寶 夾擊利東「乳鴿」
香港仔利東邨過去多年都由建制陣營盤據，直至上屆區議會選舉首次被民主黨（白鴿黨）兩位新人區諾軒及羅健熙突圍，連奪利東一同利東二兩個選區。為咗收復失地，建制派大黨民建聯決定師夷技以制夷，派番兩名八十後青年人挑戰呢兩隻「乳鴿」，而且兩人本身仲係當區居民，其中一人為漁民子弟，希望重奪有唔少蜑家人嘅利東邨居民芳心。
「漁夫之子」打街坊牌
兩名新人彭兆基及李嘉盈雖然都好後生，但同時係當區嘅「老街坊」，其中彭兆基更係漁民子弟，最近仲加入多個漁民組織，須知唔少利東邨居民都係昔日靠泊香港仔避風塘嘅蜑家人，擺明係想打另類鄉情牌。
至於李嘉盈，據聞由民記南區支部主席楊位款親自挑選嘅。楊位款形容自己係「好識之士」，不過係「知識」嗰個「識」，兩名新人都擁有高學歷，但同時願意全職服務居民，非常難得。
我哋問過身兼白鴿黨副主席嘅羅健熙，佢就暗諷對手只懂搞「蛇齋餅糉」，冇乜實際地區工作喎。
卓妮