中環出更:雪地自駕遊日 黃進達:咪亂試

日圓持續下跌,吸引唔少港人計劃聖誕節前後到日本旅行賞雪浸溫泉,但早前日本北海道一間溫泉旅館發生大火,幸好入住港人都無受傷,康泰旅行社董事總經理黃進達(Jason)都有關注事件,相信今次只係個別事件,港人遊日仍然安全,反而最令佢擔心嘅係新興嘅日本自駕遊賞雪團,呼籲無經驗者切勿亂試。

Jason解釋,其實喺雪地駕駛難度極高,路面濕滑好易跣胎炒車,加上路牌被大雪遮蓋,前面有急彎或大斜路,可能未必睇到,提醒欠缺雪地駕駛經驗嘅港人,唔好貿然起行。

講番聖誕將至,福建社團青委主任黃楚恒(Stanley)同廣東社團青委主任林凱章合作提早搞聖誕派對,兩人分頭號召兄弟捐禮物、捐錢抽獎,話咁快搞掂。Stanley透露,計劃日內赴溫哥華,為當地第三間中藥店開幕剪綵。對於加國以「快速移民」吸引專才,佢聽完就耍手擰頭,強調中港兩地機遇更多,相信有關計劃對內地人比較吸引。

廖宜春呻佔領累蝕入肉

同場現身嘅福建社團聯會常務會董廖宜春提到最近「黑仔」經歷,話說早前喺金鐘開設有機餐廳,點知拎鎖匙後翌日即爆發佔領事件,至今每日生意額只得數百元,大嘆蝕到入肉。

卓妮

第一手消息請下載on.cc東網iPhone/iPad/Android/Windows Phone Apps