政情：呻獄中身心吃不消 周庭預計6月出冊

友人探監後 社交平台又更新

周庭嘅社交網站平台再有更新，原來係有朋友喺農曆新年期間探訪佢，同佢拜年。根據轉述，周庭講起喺懲教所都係睇書、聽電台，仲期待收信嚟解悶。周庭又話自己嘅精神以及身體狀況都吃不消，仲努力適應緊入面嘅生活，又透露預計6月可以出冊，期望會有休息嘅空間，休養身體喎。

原本周庭被囚於羅湖懲教所，但南區區議員袁嘉蔚喺舊年12月探訪佢，仲喺社交平台交代佢嘅狀況，周庭幾日之後就被懲教署「升級」為甲類犯人，被安排轉倉去大欖女懲教所服刑。有說係由於周庭入獄後，仍然不斷透過探訪渠道宣傳獄內生活，延續對外界嘅影響力。呢次喺社交平台又再交代佢獄中嘅情況，唔知係幫佢定累佢呢？