中環出更：廢鑊厚顏領榮譽博士學位
人稱「廢官」嘅食物及衞生局前局長周一嶽（周一鑊），「翻閹」出任平等機會委員會（平機會）主席以來，多次想為自己同平機會擴權，又懶理早前展開歧視條例「四合一」檢討諮詢嘅眾多爭議，尋日仲若無其事接受公開大學頒授榮譽博士學位，認真非常厚面皮。
據知身為性傾向條例學校關注組召集人、學民思潮召集人黃之鋒嘅父親黃偉明唔認同公大呢個做法，可惜尋日無現身踩場，否則周一鑊更加面懵懵無處可逃。
撐黃傘小貓三四隻
講番今次公大畢業典禮，全場僅出現三把黃傘，象徵支持佔領行動嘅黃絲帶加加埋埋十隻手指數得晒，公大校長黃玉山亦無倣效浸大校長陳新滋，拒向撐傘學生頒發證書，繼續照樣向其頒發證書，令畢業禮喺無風無浪順利結束。
另一萬眾期待嘅場面亦無出現，就係黃玉山同公大學生黃之鋒無正面交鋒，繼續避而不見對方，其中黃玉山被再三追問下，都唔肯透露會否親自探望黃之鋒，重申學生係時候停止絕食同離場。
卓妮