中環出更：霸路大塞車 林智彬：大家都攰
受佔領行動封路措施影響的市民真係有苦自知。早前中華總商會青委副主席林智彬（Lawrence）出席一個活動時呻話，近排佢接喺北角讀幼稚園嘅大仔返大坑屋企，竟然花咗一個半小時，係平時十五分鐘車程嘅六倍。佢話，一場佔中令市民同學生們都好攰，希望快啲和平結束，等大家恢復平靜生活咁話。
早前首間港產陀飛輪專門店開幕，好多城中潮人去趁熱閙，Lawrence都抽空去撐場。
湊仔放學嘥多5倍時間
雖然接囝囝放學花多五倍時間，但Lawrence講起一啲都唔勞氣，仲笑得好開心，事關早前佢又添咗個仔。Lawrence都笑自己生得一副老爺相，所以要努力追番個BB女先。
知名平面設計師靳埭強（靳叔）都有到場，佢正忙於設計明年羊年郵票。靳叔話，佢由七十年代開始設計生肖郵票，所以不時都鍾意收藏生肖工藝或擺設，多年來買入唔少。佢今次設計羊年郵票就以私人收藏為藍本，再透過唔同工藝表達手法呈現，至於設計詳情就要賣吓關子喎！
講番開幕現場，間專門店係由永順年鐘錶取得品牌授權而開設，永順年主席李文偉（Gary）、副主席張霈霖及陀飛輪創辦人沈慧林都忙於招呼賓客。
現時內地遊客來港消費意欲減弱，珠寶鐘錶界生意大減，問Gary點解夠膽逆市開店？佢就話，受內地客減少衝擊嘅係高價錶，該品牌屬於中價路線，相信影響唔大。
卓妮