中環出更：理大畢業禮出奇冇抗議
佔領行動引起社會撕裂，佔領訴求仲蔓延至大學校園。早前嶺南大學畢業禮上，學生會就在場外派代表支持佔中嘅黃絲帶，場內唔少畢業生亦動作多多表達真普選訴求，又打斷獲頒工商管理榮譽博士學位嘅商務及經濟發展局前局長馬時亨發言。事件影響所及，南太集團創辦人顧明均亦提早表態，拒絕接受浸會大學喺畢業禮上向佢頒授工商管理榮譽博士，以示反佔中立場。
尋日輪到理工大學舉行畢業禮，正當外界以為又有好戲睇時，殊不知場面出奇咁和諧，既冇畢業生就佔中等政治事件表態，亦冇對獲頒榮譽博士學位或主禮嘉賓抗議，唔通理大學生對政治冷感？細問之下，原來尋日畢業禮只係畀博士畢業生及榮譽學位得主出席，當中唔少人係內地生，榮譽學位得主又冇乜爭議性，加上理大學生會近日傳出內訌，難怪無乜抗爭場面喇！
唐偉章勸學生重返校園
理大校長唐偉章就話，解決政制爭議始終要透過對話尋求共識，希望各方都勇於妥協，又話大家應該聚焦政制框架內嘅可行性。佢坦言好彩冇學生因佔中受傷，呼籲學生快啲重返校園咁話。
卓妮