渡海濠情：千里姻緣一線牽

第一位：虎女 魅力不減

師傅話屬虎嘅朋友本身驛馬運好重，所以出國嘅機會特別多，就算去到陌生嘅地方，個人魅力亦會絲毫不減，特別深受外國嘅異性朋友喜歡，所以十二生肖中最多機會譜出異地戀曲。KiKi話：「我有個表姐就係屬虎，佢去澳洲讀書，一去到就冇時間讀書，因為大把人追佢，我表姐話自己喺老家三年前分手後，一直都冇拖拍，以為孤獨終老，點知一到澳洲就正如嗰句俗語：『三年唔發市，發市當三年』，最後嫁咗個開餐館嘅澳洲男士，家陣落地生根不知幾咁幸福！」

第二位：猴女 適應力強

另一個好有異地緣嘅生肖，就係屬猴嘅囡囡，佢哋同樣驛馬運十分重，所以經常四圍去，而且本身適應能力超強，喺外地好易入鄉隨俗，所以只要有外國人追求佢哋，都會唔使點掙扎好容易就接受。KiKi話：「我就係屬猴嘅！我真係成日周圍去，我呢幾年都住過十個八個城市，而且去到邊都好易適應，只要我住得一頭半個月，就好似當地人一樣，而且我語言能力超強，好似之前識咗個日本朋友，我一個星期左右就可以用簡單日語同佢交談，所以要我嫁去外國，真係冇難度。」

第三位：蛇女 姻緣較薄

至於屬蛇嘅囡囡，佢哋與驛馬無關，純屬本身姻緣運較薄，如果選擇不正常姻緣，反而會較容易開花結果，所謂不正常姻緣，是指伴侶大十歲、少十歲、離過婚或者係外國人。KiKi話：「我有個屬蛇嘅姊妹，佢人靚身材好，呢幾年拍極拖都捱唔夠三個月，鑊鑊吵架收場，不歡而散，最後佢一氣之下就去咗歐洲流浪，點知就畀佢識咗個西班牙靚仔，兩個一拍即合，而且咁耐都冇鬧過交，關係不知幾好，而且性生活話正到不得了，上個月仲宣布結婚，所以真係唔到你唔信！」

KiKi Profile　　

年齡：22歲

三圍：34-23-34

每周大吉生肖

異性運：馬、猴、豬

桃花運：牛、羊

和合運：兔、龍、狗

撰文：小德　

攝影：阿生　

玄學提供：寶源師傅